EIS UF DE RUEDI


es isch eine vo däne täg gsi, wommer nachem schaffe nöd weiss wo ane. me weiss nur, hei wottmer sicher nöd. also mal ad langstrass. vorem gambrinus gsehn ich en ältere typ mit motörhead-schnauz und emene schweiz-cap, also sones baseball-cap in rot, mitemene wiisse schwiizer chrüz druf. er sitzt eifach det und trinkt es bier. gueti idee, hani dänkt. hey, säg ich zuenem. chan ich da anesitze? ich wür au gern es bier trinke. klar, hock ane, seit er während mir zwei bier zäme trinked, verzellt er mir churz zämegfasst, was bi ihm so lauft.

mit sinere frau damals, enere thai wo ade bahnhofstrass gschaffet hät, isch er uf thailand. det händs es huus mit 3000m2 land baut. dänn hät er irgendwas am hals übercho, e chranket, und hät de arm fasch nüme chöne bewege. falls öppis mit ihm sägi, plötzlich, hät er dänkte es wäri guet, sini frau seg nöd ohni stutz. also hät er ihre d vollmacht vo sim pk-konto geh. d frau hät drufabe alles gäld abgrument und byebye. er chunt drufabe zrugg id schwiiz, ufs sozialamt. mit dem gäld gits zwei bier und paar zigis am tag. jetzt ischer 64i, job findet er keine meh. es brännt, weisch, seit er. aber muesch füre luege, seit er no, während er sich symbolisch sini schultere abputzt. mir sitzed no biz det und redet. früener seg er immer im heuwage gsi bi de zypressestrass. d pattaya bar ischem z tüür gsi, det hät es bier elf stutz koschtet und d playboy-bar hät kein geischt gha. s zipi verträg i sowieso nöd, sind truurigi gselle det. aber das isch früener gsi, jetzt gangi nüme use am abig. jetzt gang ich hei go choche. bisch en feine kerl, seit er dänn und gaht. er heisst ruedi. eifach eine under euis und doch nöd. ciao ruedi, ziehs dure.